3. fundur faghóps 3, 12.04.2022
Fundargerð
3. fundur í
faghópi 3 um mat á samfélagslegum áhrifum virkjunarkosta,
12. apríl 2022 kl. 10:00 – 11:00 á Teams.
Fundargerð
- Fundur faghópa með verkefnisstjórn sem fyrirhugaður er 2. maí undirbúinn. Rætt um hvaða þætti í komandi verkefnum faghópurinn myndi vilja fá umræðu um á fundinum. Í því sambandi meðal annars rætt um spurningar er lúta að því hvernig best sé að afmarka það samfélag, félagslegu hópa, samfélagslegu þætti og áhrifasvæði sem faghópurinn myndi meta.
- Þar sem enn liggur ekki fyrir hvaða virkjunarkostir koma til mats í yfirstandandi áfanga rammaáætlunar var það rætt í faghópnum hvort fýsilegt væri að velja einn virkjunarkost úr biðflokki 3. áfanga og skoða sérstaklega hvernig faghópurinn myndi meta hann. Rætt um hvaða virkjunarkostir kæmu helst til greina í því sambandi. Þá var einnig rætt um að horfa ekki aðeins til einstakra virkjunarkosta heldur í ríkari mæli til tiltekinna landsvæða, enda hafi áhrifasvæði einstakra virkjana stækkað mjög á umliðnum árum, meðal annars í takt við bættar samgöngur.
- Rætt um að nálgun faghópsins beinist að því að meta um það bil fimm samfélagslega áhrifaþætti. Við val og skilgreiningu á þeim þáttum yrði meðal annars tekið mið af þeim áherslum sem rannsóknir faghóps 3 í fyrri áföngum benda til að séu íbúum ofarlega í huga, á borð við tekjuöflun sveitarfélaga, samráð við íbúa, innviðauppbyggingu, orkuöryggi, eignarhald virkjunaraðila, náttúruvernd, osfrv. Jafnframt verði tekið mið af heimsmarkmiðum Sameinuðu þjóðanna og markmiðum stjórnvalda í orku- og loftslagsmálum. Þannig verði til dæmis leitast við að leggja mat á samfélagsleg áhrif virkjunarkosta með tilliti til þess hvaða áhrif þeir hafa á markmið stjórnvalda um orkuskipti og kolefnishlutleysi. Þá var rætt um möguleika á því að láta hlutfallslegt vægi samfélagslegra áhrifaþátta taka mið af niðurstöðu félagsvísindalegra kannanna sem faghópurinn stæði fyrir.
- Ákveðið að næsti fundur faghópsins verði fimmtudaginn 28. apríl kl. 10:30.